Related Articles

• Senne Idsardi koningin in Makkum 0 18.jul
• Wedstrijdlijst Heerenveen heren 35+ d.e.l. zondag 29 augustus 2021 0 24.aug
• Wedstrijdlijst Leeuwarden heren hoofdklasse d.e.l. zondag 17 september 2023 0 13.sep

De junioarekeatsers fan de KNKB wolle kommende freed net keatse yn Boalsert. Der is foar dizze kategory in spesjale kompetysje opset. Dy kompetysje wie oan’t no ta in súkses, mar dit jier giet it mis. Dat hat te krijen mei de eksperiminten dy’t de KNKB útfiert om it keatsen oantrekliker te meitsjen. It earste eksperimint wurdt útfierd by de junioarekeatsers.

Dêr wurde net mear 6 punten yn in earst ferkeatst mar 4. Mei as doel dat partijen rapper dien binne. Dat is it gefal, mar de keatsers fine it hielendal neat. In partij is neffens harren no fiersten te rap dien. Dat hat bliken dien op de earste partij dy’t op 19 maaie keatst is yn Makkum. “We sitte langer yn de auto as dat we op it fjild stean”, wie de grutte klacht fan de keatsers. 

Freed soe de twadde partij keatst wurde yn Boalsert, mar op tiisdeitemoarn hienen har foar dy partij noch mar 5 keatsers oanmelden. Dat is fansels fiersten te min en it liket der net op dat der in protte mear by komme sille.  Oanmelde kin noch oan’t tiisdeitejûn 20.00 oere.

De organisearjende feriening Boalsert hat moandei ekstra bestjoersoerlis hân en hat besletten dat de partij troch gean kin as der minimaal acht partoeren op de list komme. Oars wol Boalsert de partij net organisearje. 

KNKB foarsitter Coos Veltman lit witte dat it keatsbûn him drok dwaande hâldt mei de ûntsteane sitewaasje. “Wy hawwe ferliden wike mei in delegaasje fan de keatsers in earste evaulaasje hân oer dit eksperimint.  Wy tochten doe dat we der fierder mei koenen. Dat liket no oars te wêzen. We moatte no earst presys witte wat hjir no spilet.  Fernijïng docht altyd wol in bytsje sear. Mar wy moatte wer by elkoar komme. De keatswrâld is te lyts om foar elkoar oer te stean.”